Numeri 09
01In eerste moand van t twijde joar noadat ze tou Egypte oettrokken wazzen, zee de HEER in woestijn Sinai tegen Mozes:
02"Isrelieten mouten op zien tied t pesachovver brengen.
03Op n vattienden van dizze moand in t twijduustern mout ie t op vaaste tied kloarmoaken. Ie mouten t brengen volgens ale regels en veurschriften dij der bie heuren."
04Dou zee Mozes tegen Isrelieten dat ze t pesachovver brengen zollen.
05En ze vierden Pesach op n vattienden van eerste moand in t twijduustern in woestijn Sinai. Isrelieten deden t sekuur zo as de HEER Mozes besteld haar.
06Nou wazzen der gounent dij onraain wazzen deurdat ze in aanroaken west haren mit n liek en doarom dij dag gain Pesach vieren konden. Ze kwammen zulfde dag nog bie Mozes en Aäron.
07Ze zeden tegen hom: "Wie binnen onraain deurdat we in aanroaken west hebben mit n liek. Woarom zol wie der van weerholden worden om middenmaank Isrelieten ons goave aan de HEER te brengen op tied dij der veur staait?"
08Mozes zee tegen heur: "Blief hier wachten, den zel ik heuren wat de HEER veur joe beoddert."
09Dou zee de HEER tegen Mozes:
10 "Zeg tegen Isrelieten: 'As ter ain van joe of van joen noazoaten onraain is deur n liek, of ain is wiedvot bie pad, mout dij toch t pesachovver veur de HEER kloarmoaken.
11 Dat mouten ze doun op n vattienden van twijde moand in t twijdonkern. Ze mouten t eten mit ongerezen brood en bittere kruden.
12 Ze maggen nait wat overholden tot aanderdoagsmörgens en ze maggen der gain bonk van breken. Ze mouten t doun volgens ale regels van Pesach.
13 As ain raain is en nait wiedweg bie pad, en t noalet om t pesachovver kloar te moaken, mout e van gemainschop ofsneden worden, want dij het goave aan de HEER nait brocht op tied dij der veur staait. Dij mout zien zunde droagen.
14 Ook as n vremde dij bie joe touholdt, t pesachovver aan de HEER brengen wil, mout e t doun volgens regels en veurschriften veur Pesach. Zulfde regel geldt veur joe, zowel veur vremden as veur geboren Isrelieten.'"
|
